АКАФИСТ БЛАЖЕННОМУ СТАРЦУ МИХАИЛУ ПЕРЕСЛАВСКОМУ ЧУДОТВОРЦУ ХРИСТА РАДИ ЮРОДИВОМУ
крест
Московский Патриархат.
Ярославская епархия.
Переславский муниципальный округ.
Приход Смоленской церкви села Ям
Приход Москва-Ям Банковские реквизиты для пожертвований
на восстановление Смоленской церкви села Ям


АКАФИСТ БЛАЖЕННОМУ СТАРЦУ МИХАИЛУ ПЕРЕСЛАВСКОМУ ЧУДОТВОРЦУ ХРИСТА РАДИ ЮРОДИВОМУ

АКАФИСТ
БЛАЖЕННОМУ СТАРЦУ
МИХАИЛУ ПЕРЕСЛАВСКОМУ ЧУДОТВОРЦУ
ХРИСТА РАДИ ЮРОДИВОМУ

КОНДАК 1

Избранному Богом в Небесный чертог Райский, блаженному старцу Михаилу, Христа ради юродивому, яко покровителю нашему и молитвеннику, похвальное принесем пение. Ты же, блаженне отче, яко имея дерзновение ко Господу, от всяких нас бед и болезней свободи, с любовию зовущих ти:

Радуйся, блаженне старче Михаиле, всея земли Переславския утешение.

ИКОС 1

Ангелом хранителем ко спасению наставляем, презрев всю суету жития мирскаго, оставил еси родительский дом, вступив на узкий тернистый путь, ведущий в Царство Небесное. За сие приими от нас, блаженне, похвалы сия:

Радуйся, яко Бога ради из дома отчего изшел еси;

Радуйся, яко самопроизвольную нищету ради Христа избрал еси.

Радуйся, чистый голубь Христов;

Радуйся, блаженне старче Михаиле, всея земли Переславския утешение.

КОНДАК 2

Имуще от Бога дар прозорливости, еще в детских играх своих прикровенно предрекал еси людем будущее, терпяще насмешки и поругания от родных и сверстников, слышащих сия и безумным тебя полагаху, блаженне Михаиле, выну воспевал ко Господу хвалебную песнь: Аллилуиа.

ИКОС 2

Разум Богомудрый стяжав, юный отроче Михаиле, последуя Евангельским словам Спасителя, вся Его ради оставил еси и, облекшеся в нищетныя рубища, изыдоша странник Божий, последуя Господу, не имевшему где главу приклонити. Сего ради зовем ти, отче:

Радуйся, рубищным одеянием, яко ризою спасения, облекохся еси; радуйся, для мира и суетных забот его умерый еси.

Радуйся, родителей и сверстники оставил еси; радуйся, всем сердцем Бога возлюбил еси.

Радуйся, страдания людския прозорливо в дали необразимей зревший; радуйся, страждущим людем утешение подававший.

Радуйся, яко для вечныя жизни душею воскресл еси; радуйся, яко сего ради Царство Небесное стяжал еси.

Радуйся, блаженне старче Михаиле, всея земли Переславския утешение.

КОНДАК 3

Силою, данною ти свыше, блаженне, иго благое Сладчайшего Господа нашего Иисуса Христа на ся с радостию возложил еси, всецело предав себя на волю Божию, не имея пищи и теплой одежды, скитался по граду Переславлю и. его окрестностем, получая от добрых людей и приют, и вся насущная, благословлял имя Господне, воспевая: Аллилуиа.

ИКОС 3

Имуще велию любовь ко Господу, плоть свою, блаженне Михаиле, распял еси со страстьми и похотьми, бдением и трудами, постом и воздержанием, нестяжанием и смирением. Сего ради вселися в тя Дух Святый, наставляя нас, грешных, ублажати тя сице:

Радуйся, яко от соблазн мира изшел еси; радуйся вся красная мира сего в уметы вменил еси.

Радуйся, верою крепкою и живою вооруженный; радуйся, крестным знамением и молитвою огражденный.

Радуйся, блаженне старче Михаиле, всея земли Переславския утешение.

КОНДАК 4

Буря гонений и искушений найде на тя, отче, егда ты предсказал мор в своем селе, ископав посреде села две могилки и наполнив их незрелыми яблоками. Егда соседи стали бранить тебя и бить, ты отвечал им: «Не любо - поплачешь». И, изшед из села, нашел приют в Никольском монастыре в келье иеромонаха Самуила, воспевая Господу: Аллилуиа.

ИКОС 4

Восприяв на ся юродство Христа ради, смиренно терпяще поругания и осмеяния людския, всем нуждающимся подавал помощь и совет. Изумляясь сим терпением и добротою твоею, возглашаем ти сия:

Радуйся, яко премудрость Божию Христа возлюбил еси; радуйся, насмешками и поруганием людскими, яко царскими утварями, себе украшал еси.

Радуйся, биение и оплевание, яко язвы Христовы, на теле своем носил еси; радуйся, яко, умерщвляя плоть, зимою и летом одежду одну и ту же носил еси.

Радуйся, нищету добровольную Христа ради приявший; радуйся, века сего суемудрия юродстом твоим отвергатися нас научивший.

Радуйся, блаженне старче Михаиле, всея земли Переславския утешение.

КОНДАК 5

Боготечней звезде уподобился еси, отче честный, проходя веси и селения земли Переславския, собирая милостыню возле храмов и часовен. Все собранные пожертвования приносил еси в дар Богу с молитвою за добрых даятелей: раздавал еси нищим, или опускал в церковныя кружки. Своим благочестием и душеполезными наставлениями многих приводил ко спасению, да славится всюду имя Святыя Троицы: Отца и Сына и Святого Духа, красным пением: Аллилуиа.

ИКОС 5

Видевше люди града Переславля и окрестностей его ангелоподобное житие блаженного старца и благодатныя дары прозорливости, Богом ему данныя, потекоша к нему со своими скорбями и нуждами. И, получив помощь, славят своего благодетеля тако:

Радуйся, яко дар благодатный прозрения от Бога приял еси; радуйся, яко тем многих от пути нечестия отвратил еси.

Радуйся, целителю язв душевных; радуйся, врачу недугов телесных.

Радуйся, скорбящих утешителю; радуйся, о душах усопших усердный молитвенниче.

Радуйся, блаженне старче Михаиле, всея земли Переславския утешение.

КОНДАК 6

Проповедником Евангельских истин явился еси, блаженне, праведным житием показуя в сии последняя времена живой образ истиннаго христианства и подвижничества, поучающий и зовущий нас, грешных, оплетшихся земными пристрастиями и житейскими попечениями, взыскати спасительнаго пути, ведущаго в Царство Божие, идеже ангели и вси святии немолчно поют: Аллилуиа.

ИКОС 6

Возсия свет Божий и спасительный благодати в душе немощнаго калеки (бывшаго воина) Никиты Русакова, и благословением старца Михаила - иконой Царицы Небесной «Взыскание Погибших» - получив благодать исцеляти недуги, подвижник изряден явился еси блаженный девственник Никита, благодарно взывая:

Радуйся, наставниче спасения; радуйся, податель святаго благословения.

Радуйся, пред Богом о нас теплый молитвенниче; радуйся, благочестия учителю.

Радуйся, от козней вражиих души наша молитвою своею ограждающий; радуйся, в добродетелех христианских преуспевати нам помогающий.

Радуйся, нечестивых вразумителю; радуйся, благочестивых покровителю.

Радуйся, блаженне старче Михаиле, всея земли Переславския утешение.

КОНДАК 7

Хотя скрыти свое духовное делание от человеческих взоров, юродствовал еси, блаженне. И часто, видя его юродство и слыша непонятные слова, глумились люди над ним. Он же, терпяще все Бога ради, благословлял имя Господне, воспевая: Аллилуиа.

ИКОС 7

Новую благодать дарова тебе, отче, Господь: безвредно бо в зимний мраз и студень в ветхой одежде ходил еси, праведниче святый, подвизая нас возглашати ти со умилением:

Радуйся, яко естества уставы силою Божиею победил еси; радуйся, яко зимний мраз и летний вар терпел еси.

Радуйся, яко тело свое сими подвигами духу покорил еси; радуйся, теплотою Духа Святаго согретый.

Радуйся, пламенем любве божественныя воспламененный; радуйся, яко многострадальным житием своим мучеником уподобился еси.

Радуйся, блаженне старче Михаиле, всея земли Переславския утешение.

КОНДАК 8

Странно бысть людем мирским видети старца в коротенькой курточке, вервием подпоясанной, с красными повязками (как бы поручами) на руках, со скуфеечкой в левой руке, в опорках от сапог. И егоже не бе достоин весь мир, бесчестием и поруганием оскорбляти, не ведуще его духовнаго совершенства, ни еже Богу пети благоразумно: Аллилуиа.

ИКОС 8

Всем вся был еси, блаженне Михаиле: скорбящим утешение, немощным покрове и защищение, печальным радование, болящим исцеление. Сего ради вопием ти:

Радуйся, яко преподобный Алексий, человек Божий, дом и родителей Бога ради оставил еси; радуйся, яко юродством своим мудрецов века сего посрамил еси.

Радуйся, Христов угодниче, в мире надмирно поживый; радуйся, труды многими велию благодать стяжавый.

Радуйся, во тьме греха благодатию Божиею сиявший; радуйся, немощных в вере укрепляющий.

Радуйся, дух злобы в сердце озлобленных угашающий; радуйся, мир Божий в сердца людей вселяющий.

Радуйся, блаженне старче Михаиле, всея земли Переславския утешение.

КОНДАК 9

Странником бездомным прошел путь жизни, твоея, блаженне Михаиле, в земли Переславския. Уже бо людем, гибнущим в безумии греха, ты явил путь спасения, во еже вопити Богу: Аллилуиа.

ИКОС 9

Часто, молящеся по ночам в Никитской часовне у Студенаго потока в овраге, призывал благодать Святаго Духа на землю Переславскую, Мы же, помощь твою получающе, поем ти тако:

Радуйся, святость церковную возлюбивый; радуйся, благий образ служения Богу явивый.

Радуйся, града нашего Переславля похвало и ограждение; радуйся, прибежище наше в скорбех и огорчениях.

Радуйся, православный люд молитвами твоими заступающий; радуйся, обидимых и молящихся тебе защищающий.

Радуйся, в горних обителех пребывающий; радуйся, миру озлобленному мудрость Божию являющий.

Радуйся, блаженне старче Михаиле, всея земли Переславския утешение.

КОНДАК 10

Хотя спасти душу, ты плоть свою со страстьми и похотьми распял еси и, невозвратно себя отвергши, крест свой на рамена своя возложил еси и Христу всем сердцем последовал еси, поя ему: Аллилуиа.

ИКОС 10

Стена еси твердая и прибежище необоримое явился молящимся тебе, отче Михаиле. Ты же заступай и нас от враг видимых и невидимых молитвами твоими, да зовем ти:

Радуйся, на труд духовный нас воздвигающий; радуйся, от сетей вражиих нас избавляющий.

Радуйся, в скорбех и обстояниях бедствующим помогающий; радуйся, на спасения стези нас наставляющий.

Радуйся, души неверующие к Богу обращающий; радуйся, сердца, неверием помраченныя, светом Божиим просвещающий.

Радуйся, покаянию и заповедем Божиим нас научающий; радуйся, прославляти и за все благодарити Господа нас вразумляющий.

Радуйся, блаженне старче Михаиле, всея земли Переславския утешение.

КОНДАК 11

Пение благодарственное приносим Христу Богу нашему, даровавшему нам преславнаго угодника Своего, скораго во всех скорбех помощника и чудотворца, поюще Ему: Аллилуиа.

ИКОС 11

Светозарный светильник души своея имея выну горящим, мирно и тихо причастившись Пречистых Тайн Христовых, блаженне, отошел ко Господу. Множество народа с любовию и слезами провожало в последний путь праведника Божия, вопиюще:

Радуйся, самопроизвольный мучениче; радуйся, святый праведниче.

Радуйся, яко добрая дела своя втайне совершал еси; радуйся, распятием плоти, уничижением и смирением страждущему на Кресте Христу подражал еси.

Радуйся, яко духом предстати Престолу Всевьшняго сподобился еси; радуйся, яко ныне венцем райским от Господа увенчан еси.

Радуйся, блаженне старче Михаиле, всея земли Переславския утешение.

КОНДАК 12

Благодать, данную ти от Бога, блаженне, ведуще, тебе просим и молим: не остави нас ходатайством своим, испроси нам грехов прощение, болезней исцеление, наветов вражиих прогнание, да спасшеся, прославим великое милосердие Божие, восклицая: Аллилуиа.

ИКОС 12

Поюще дивнаго во святых Своих Бога, ублажаем и свято чтим в безчисленном сонме святых Его блаженнаго старца Михаила, прося его молитв, помощи и благословения на вся труды и дела наша. Ты же услыши нас, отче, величающих тя сице:

Радуйся, Божий избранниче; радуйся, наш пред Богом предстателю.

Радуйся, мужественно крест свой понесший на земли; радуйся, на небеси и на земли славимый и блажимый.

Радуйся, блаженне старче Михаиле, всея земли Переславския утешение.

КОНДАК 13

О, блаженне старче Михаиле, не возгнушайся похвалами недостойными нашими, но приими малое моление сие и испроси у Господа вся благая на пользу душ и телес наших, да сподобимся и мы купно с тобою в вечной жизни воспевати Богу: Аллилуиа.

(Сей кондак читается трижды, затем 1 икос «Ангелом хранителем...» и 1 кондак «Избранному Богом...).

МОЛИТВА

О, отче блаженне Михаиле! На земли юродивый, на небеси премудрый! Прошедши свой доблестный путь земной, ныне с высоты небес призри на нас, грешных, в море житейском обуреваемых: от плоти - страстьми и болезнями, от мира - досаждениями и соблазнами, от диавола - многочисленными кознями, и уже близ потопления кораблики душ наших, не имуще крепкаго якоря веры, надежду полагающе на свои силы и человеческую помощь, с угасшим светильником любви и благочестия. Не закосни, отче Михаиле, помощи нам, не по достоинству нашему, но по милосердию твоему, сподобясь всемилостивому Спасу нашему Иисусу Христу. Укрепи нас в вере, надежде и любви, хладных и черствых сердцем, согрей своим участием, болезни наши уврачуй, скорби и печали отыми от нас, на скользком пути сем земном подаждь нам руку помощи, да укрепившись телом и душею, с терпением крест свой понесем, с упованием на Бога и твое скорое предстательство, и да сподобимся, по отшествии из жития сего, достигнути Царствия Небеснаго, славяще Отца и Сына и Святого Духа. Аминь.


Православный календарь